سامح النمر
مشرف تحت الاختبار
 عدد المساهمات : 59
تاريخ التسجيل : 09/03/2011
 | موضوع: إهداء لشهداء 25 يناير - قصيدة "ورد الجناين"  السبت أبريل 23, 2011 4:44 pm | |
|
شعر: سمية رمضان عبد الفتاح
ورد الجناين يفتح فوق أراضينا
يرسم لنا بالأمل أحلى أمانينا
بوريده يسقي الوطن
وبنفسه يفدينا
قام الولد بالجلد
قال: البلد بلدي
ومهرها غالي
ومهرها عندي
عمري يكون التمن
عمري فدا بلدي
****
صوت الولد للبلد يعلا بغنوايا
والله غالية عليه يا أمايا
أوعاكي يا أمة تصدقي إني
خاين.. عميل.. أو تسمعي وشايا
****
أنا ابنك انتِ.. وانتِ عرفاني
وإزاي تهوني فـ يوم.. يا ساكنة وجداني
وعشقت أرضك أنا.. وبرغم أحزاني
وإن جيي أبوح بالهوى ليه يخرسوا لساني؟!
****
ونديت يرد الصدا: مين طفا قنديلك؟
متغربة خطوتي عنك أناديلك
وأخوض بحار الضنا علشان أعديلك
أرسم نهارك أنا.. وامحي ظلام ليلك
****
أنا اللي عاشقك وعاشق يا أمه مواويلك
كبرت على أرضك.. وشربت من نيلك
وقلت أزرع هنا.. وبحب أبنيلك
دمي لأرضك قنا.. تطرح محاصيلك
ولاد شداد يا بلد.. وهما دول جيلك
هينوروا سكتك.. ترجع مواويلك
تصحي فينا الأمل.. وشمس قنديلك.
| |
|
